بوابة اليوم : على القماش يكتب ..الانظمة تسقط بالظلم والفساد ولا تسقط بالشائعات
بقلم : على القماش
الجرايد كلها بتكتب عن تحذيرات من محاولات اسقاط الدولة عشرات المقالات عن ما يسمى بحروب الجيل الرابع والشائعات لاسقاط الدولة
لوجه الله فيه فرق بين الدولة والنظام .. مصر عدى عليها الف عدو وكانت فى اوقات زى الطريق الدائرى كل اللى ماشى بيعدى عليها وفضلت باقية .
الانظمة بتسقط لكن بييجى اللى بيرد البلد .. وده من زمان الزمن .. الهكسوس احتلوا مصر والحاكم اتعالى وقال اصوات فرس النهر فى طيبة تقلق مضاجعى رغم ان المسافة بينه فى شرق الدلتا وطيبة فى الاقصر الف كيلو !
جاله كامس وخليفته احمس من طيبه وقاموا بطرده هو ومن معه شر طرده .. لان زى ما فيه اسباب سقوط . فيه اسباب نجاح.
الشائعات لا تسقط دولة ، واذا كانت تسقطها ، فلماذا لم تسقط فى زمن كان يصعب فيه محاربة الشائعات حيث كانت وسيلة نقل الاخبار عن طريق شاعر بالربابة ؟!!
وبعدين حرب الشائعات يكون بحرية المعلومات والشفافية والمصداقية ، وليس بالخوف منها .
اما ما يسقط البلاد بحق فليس الشائعات ولا الجيل الرابع ولا اى جيل .. اقرأوا التاريخ تجدوا سبب السقوط الظلم او السفه والفساد .
اخر مقال قرأته فى الاهرام كان بعنوان " أنتبهوا من هنا يكون اسقاط الدولة " والمقال يتحدث عن البيروقراطية والروتين .
صدقت .. ولكن اذا كان رمز البيروقراطية والروتين فى مصر مجمع التحرير .. فان السقوط يبدأ من ميدان التحرير !!
وبرضه بيكون بسبب الظلم والسفه والفساد
واسمعناه . بيقولها قوية .. عيش . حرية . عدالة اجتماعية !
أضف تعليق